101 Reykjavík
Við Ránargötu 4A er að finna eitt elsta hótel Reykjavíkur, en þar hófst hótelrekstur með City Hotel árið 1959. Húsið var upphaflega teiknað sem íbúðarhús af Guðmundi Guðjónssyni húsameistara, en þegar það var orðið fokhelt keypti hlutafélagið Rán það og ákvað að breyta því í gistihús. Nokkrum árum áður höfðu lög verið hert þannig að óheimilt var að nota íbúðarhús sem gistihús, en leitað var til ráðherra og húsnæðismálastjórnar og fékkst fljótlega leyfi, enda var mikill skortur á gistiplássi í Reykjavík á þessum tíma.
Þessi sögufræga bygging hafði munað fífil sinn fegri þegar Bergey eignaðist hana árið 2022. Eftir metnaðarfullar endurbætur opnaði þar hótelið Local 101 Vesturbær með 30 hágæða herbergjum, móttöku, veitingarými og bar.
Local 101 Vesturbær er rekið af Anchor Hospitality, sem er í eigu hjónanna Ölmu Bremond og Davids Siklos, en þau reka einnig tvö hótel í París undir merkjum Local 101. Hönnun hótelsins var í höndum Anchor og arkitektsins Grétars Arnar Guðmundssonar, en Atlas verktakar sáu um framkvæmdir.
Kynntu þér Local 101 Vesturbæ hér: Local 101

















