Bergey

Við Óðinstorg, eitt af fallegri torgum Reykjavíkur, stendur Týsgata 8 þar sem Torg Apartments og barinn Bodega eru til húsa. Húsið var reist árið 1934 eftir teikningum Einars Erlendssonar. Sama ár opnaði Sigurður Gíslason þar Ávaxtabúðina, sem seldi nýlenduvörur, ávexti og tóbak á horninu í nær tvo áratugi. Árið 1953 tók Náttúrulækningabúðin við, ein fyrsta heilsubúð landsins, og starfaði þar í rúm tuttugu ár. Síðar voru í húsinu meðal annars bókaforlag, gallerí, tískuverslun og kaffihús.

Í húsinu eru sex hótelíbúðir og á jarðhæðinni er hinn vinsæli bar Bodega.